Siri i livet

Kveldstur

Siri — Fri, 04 Jun 2010 22:44:13 +0000

Eg har gått ein tur i kveld, denne første kvelden heime. På vegen kjende eg brått ei lukt som eg ikkje heilt kunne setje fingeren på. Eg tok eit ekstra andedrag, og lukta var så god at eg gløymde heilt at eg måtte hugse å puste utover også. Eg sniffa og snusa og smilte for meg sjølv. Det lukta hegg og gras og blomar og sol og varm asfalt som har vorte litt kald igjen, og eit snev av sau. Det lukta bygdesommar, og det må vere den beste lukta eg veit om. Eg håper eg aldri gløymer å setje pris på den lukta. Eg trur faktisk eg strekkjer meg så langt at eg kallar det ei duft.

Eg trur eg har vorte litt inspirert igjen. Det er bra. Då vert det kanskje ei og anna bloggoppdatering i løpet av sommaren.

Handlingslamma

Siri — Sun, 18 Apr 2010 16:42:34 +0000

Eg er handlingslamma. Det vesle eg faktisk får gjort, skjer i skate film, og alle skumle datoar nærmar seg kvalmande fort. Eg har disponert tida ugunstig og no går det ut over meg sjølv. Frustrerande.

Valentinsdag ja…

Siri — Sun, 14 Feb 2010 18:24:19 +0000

Det er Valentinsdagen sjølv i dag. I bupelen min er det ein person, og det er meg. Det burde kanskje vere litt trist, men det er i grunnen litt godt. Eg har hatt vitjing i helga, så eg har ikkje vore så frykteleg einsam. Me har handla og ete god mat, sett kjekke folk og vore på kino. To single jenter såg Valentine`s day, der alle dei kjekkaste mennene er samla på eit brett. Det vart litt fnising, for å vere heilt ærleg. Kjekt! Men no er Solfrid reist, og eg sit att åleine. Snufs.

Det er morsdagen også. Mi mor svarte ikkje då eg prøvde å ringje, men gratulerer med dagen mammis!

Veka som er over har gått med til teikning av sjølvportrett (det er jo i grunnen ei historie for seg sjølv, men eg tek ikkje den her og no), og skikurs frå onsdag til fredag. Eg kan ikkje seie eg lærte frykteleg mykje på det kurset, men det var ein kjekk tur. Sosialt og fint. No står ei ny veke for tur. Ei vanleg, ordinær skuleveke, den første etter jul. Kanskje det vert greitt, eg veit ikkje. Eg har i grunnen gløymt korleis det var. Det som derimot er heilt sikkert, er at det berre er to slike veker att før eg skal heimatt ein tur. Studieveke kallar dei det, så gjenstår det berre å sjå kor mykje studering det vert. Hurra for det!

Det var dagens oppdatering. Eg er må pakke ut og vaske kle, men eg har ikkje støv lyst. Det kan hende det ikkje skjer i kveld. Kjenner eg meg rett.

Jepp! God veke til alle der ute!

Pause

Siri — Tue, 02 Feb 2010 16:47:30 +0000

Det er pedagogikk det går i. Piaget og Vygotskij, Bruner og Leontjev og anna snadder. Eg les. Så skal eg skrive mange ord. Men no les eg, og det er tungt stoff. Så tungt at eg må ha pause mellom kvart avsnitt. Hadde pausene vore lange, kunne eg gått på fjellet i kvar og ei av dei. Det er der eg aller helst vil vere i desse dagar, for det er sol. Men det er ofte slik at pausene er kortast.

No er visst denne også over…

Le eller grine…lissom?

Siri — Mon, 18 Jan 2010 17:12:00 +0000

Hei, jeg er 15 år eller noe, og nynorsk er så sykt lame lissom. Jeg syns selv jeg er teit og stygg. Syns du? Slik ser jeg ut. Trutmunnen er helt ekte, og jeg kjøpte denne lekre partytoppen for bare 599. Jeg skal ha den på i kveld når jeg skal feste og flørte med de diggeste og besteste folkene i verden lissom. Jeg har tatt selvbruning, og det ble bare så sykt digg. Jeg er bare megaklar til i kveld. Åh, jeg er så teit! Men jaja, Rihanna er bare så utrolig HOT!

Helsing bloggar eg tilfeldigvis kom over i dag. Hmm. Er det litt synd i slike?

Nytt semester, nye tankar

Siri — Sun, 17 Jan 2010 15:42:11 +0000

Ja, då var eg her igjen, gitt. Den er ikkje det den eingong var, denne bloggen. Men eg glimtar til. 2010 er framleis nokså rykande ferskt, men eg merkar at det kjem til å fyke avgarde, slik som år ofte gjer. Eg er framleis student, men eg studerer ikkje akkurat flittig førebels. Men eg har skifta innstilling til studielivet mitt. Den er ny av året, og går ut på at eg ikkje skal stresse. Eg er fullstendig klar over at eg skal produsere mykje i løpet av rimeleg kort tid, og at det kanskje hadde vore fordelaktig dersom eg dirsponerte tida mi litt annleis. Men slik har eg alltid vore. Eg har aldri dirsponert tida mi frodelaktig, men eg har alltid komt i mål med mine prosjekt. Dersom eg tek meg ein tur i bloggarkivet mitt, er det tydeleg at det hovudsakleg blogging det gjekk i på vidaregåande. No er det Facebook (fy og skam og fysj og nei og nei). Men eg fekk vitenemålet mitt då, og skal klare å fullføre også høgskulereisa eg har starta på.

Bergen by går no lysare tider i møte, og godt er det! Kanskje vert det aktuelt å puste frisk luft på bakkenivå framover. Det er trass alt stort sett der eg held til, sjølv om eg gjerne skulle brukt meir tid på skjønne fjell.

Forrige veke var eg på Løvstakken tre dagar på rad, og der var det ikkje akkurat grå luft. Det var magisk og iskaldt!

Elles kjenner eg meg litt prega av eit visst jordskjelv for tida. Eg kjenner meg makteslaus, og har lyst til å oppmode alle til å avsjå ein slant til hjelpearbeid på Haiti. Studentar, me har meir enn nok! Der fekk eg sagt det.

Takk for no!

God jul og godt nyttår!

Siri — Wed, 30 Dec 2009 23:04:27 +0000

Det vart 3.sundag i advent og 4.sundag i advent, eg reiste heim og det vart jul. Det går i rangling og god mat, snøver og spel. Eg nyt dagane. Dei siste i 2009. Eg er i ferd med å vinke farvel til nok eit år, og vil ynskje alle det beste i det komande. Mykje har hendt og mykje skal hende. Til lukke med det til meg og alle andre.

2.sundag i advent

Siri — Sun, 06 Dec 2009 16:05:16 +0000

Allereie! Den starta fint med smilande egg og sol inn altandøra. Kaldt ute, lunka inne. Julemusikk og levande lys. Den heldt fram med skulearbeid, og eg kjenner meg lei no. Eg skriv om læringerfaringar av forskjellege observasjonsteknikkar og ser bilete av blomsterlause planter, livet i fjøra, sopp, tre og busker og småkryp i ferskvatn og skog. Innspurten er igong. Eg gler meg til han er over. Eg gler meg til 3. søndag i advent. Då er eg ferdig med pedagogikkoppgåve, artsprøve, dei to siste pedagogikkførelsingane i 09, matematikkveiledning, naturfagrapport, og praksisseminar.

Det skal verte uendeleg godt. Det var dagens djupe sukk…

Snegelspytt

Siri — Mon, 30 Nov 2009 19:47:25 +0000

Det er siste dagen i november. Praksis nærmar seg diverre slutten, og eit par veker med skule er like om hjørnet, før eg med fryd og gaman kan vende snuten mot min skjønne heim. Det er advent, og eg høyrer vakre pianotonar av Iver Kleive og førebur meg til den o store artsprøva eg skal ta om vel ei veke. Når det er artsprøve må alle studentane (som skal opp, vel å merke) lære seg 118 ulike artar, for så å verte testa i 20 av dei. Kva for nokre 20 det vert vites ikke, så då er det 188 som må puggast. Det er frykteleg travelt, men midt i all frustrasjonen kom eg over noko eg fann særs interessant. Høyr no her:

Alle har nok sett det. Spytteklysene som heng på gras og strå om sommaren, og som for meg alltid har vore snegelspytt. Kanskje er det nokon som kallar det kjærringspytt eller trollspytt, det er visst ikkje uvanleg det heller. Men, når eg just nu, tok føre meg kvar einskild art på artslista mi, kom eg over ei gruppe artar som heiter “spyttsikade”. Dette var eit ukjent ord for meg, og eg ergra meg litt. Eg søkte på Internett, og fekk opp eit bilete av ei plante. Eg ergra meg litt til, for denne artsgruppa stod under SMÅKRYP PÅ LAND, og planter er så vidt eg veit ikkje kvalifiserte for ei sådan plassering i biologiens naturfaglege univers. Eg konkluderte med at eg måtte lese det som stod om biletet. Då viste det seg at det var såkalla snegelspytt på den planta som var på biletet, og at snegelspytt slettes ikkje er snegelspytt i det heile. Spyttet som så lekkert heng på graset om sommaren er det spyttsikadene som har hengt der, for å vare larvene sine. Dei legg egga sine i denne spytteklysa, og når larvene kjem ut, er spyttet stivt på utsida, og dei kan leve inni der og kose seg med næring frå planta. Det må også nemnast at det er ikkje mange som har sett spyttsikader. Dei kan ikkje lage lyd, og er bittesmå.

Kult dyr!

Så rart så rart…

Siri — Thu, 12 Nov 2009 17:00:13 +0000

Eg har tid. God, god tid enkelte dagar. Eg set meg ned ved pulten på romet, og har planar om å gjere noko. Eg har lyst og eg har tid. Eg kan velje fritt. Skrive didaktiske planar over aktivietar som skal gjerast, lese nyttige ting om kvardagen min, byrje å lage dispsisjon over diverse oppgåver som snart skal inn, reflektere over eigne erfaringar, planlegge samlingar, analysere observasjonar, skrive praksisforteljingar…eg kan halde fram i lange tider med oppramsing. Eg har vore klar over alt som skal gjerast heilt sidan eg tok til på FØU i haust. Det er praksisrealtert alt saman. I morgon har eg vore i praksis i fire veker, og eg har ikkje gjort ein døyt.

Eg har lyst. Eg har tid. Men eg får det ikkje til. Eg spør meg sjølv om det er kjekkare å sitje her åleine og sjå i veggen, enn å sitje her åleine og lære noko interessant. Eg svarar nei, men gjer ikkje noko med det.

Det er litt rart.